VVIP ලොක්කා දුටු පොලිස්කාරයා පැන දුවයි.

 

කලකට පෙර සිදුවූ මේ කතාව මට කිව්වේ පොලිසියේ නිලධාරියෙක්මයි. මේ ඔහු කිව්ව ආකාරයමයි.

ඒ දවස්වල කොළඹ පුත්තලම් පාරේ කොච්චිකඩේ මා ඔය පාලම ගාව පොලිස් බැරියර් එකක් තිබුණා. එතනින් යන බොහෝ වාහන පරීක්ෂා කළා. මොකෝ යුද්ධෙ කාලෙනෙ.(වාහන පරීක්ෂා නොකළත් බැරියරේ තවමත් තියෙනවා.)

 

ඔතන රාලහාමිලා දෙතුන් දෙනෙක් රාජකාරි කරනවා. දවසක් මහ රෑ පුත්තලම පැත්තට යන කාර් එකකට නවත්තන්න එක රාලහාමි කෙනෙක් සංඥා කළේ VVIP වාහනයක් බව නොදැන. ඇරත් ඒ දවස්වල VVIP වගේම VIP වාහන ගියෙත් ඉස්සරහින් පස්සෙන් ගාඩ් වෙහිකල් එක්ක. මේ තනි කළු කාර් එකක්.

 

කාර් එක අයින් කරලා නැවැත්තුවා. රාලහාමි රියැදුරු ආසනේ ගාව හිට ගත්තම වීදුරුව මදක් පාත් වුණා. රාලහාමි මොනාත් අහන්න කලින් රියැදුරු මෙහෙම කිව්වා.

"මේ VVIP වාහනයක්.."

 

රාලහාමිට කතාව ඇල්ලුවේ නෑ. VVIP නං ගාඩ් එකක් තියෙන්න එපැයි. එක්කෝ මූ බොරු කියනවා. නැත්තං මූ හොර ගමනක් යනවා. රාලහාමිට පොඩි පාට් එකක් දාන්න හිතුණා. 

 

"VVIP නං කෝ ගාඩ් එක. හරි වාහනේ VVIP කියමුකො. කවුද VVIP.? තමුසෙ මාව අන්දන්න නේද යන්නෙ?" රාලහාමි පාට් එකක් දැම්මා.

 

"ඔය හාදයට මේ පැත්තෙන් එවන්න.." පිටුපස සීට් එකෙන් ගැඹුරු හඬක් ඇහුණා.

"අන්න සර් කතා කරනවා. එහා පැත්තෙන් යන්න.." රියැදුරු කිව්වා.

පිටුපස්සෙ වීදුරුව පාත් වුණා. අපේ රාලහාමි සැකේට පිටිපස්සෙ සීට් එකට එබුණා.

"මමයි යන්නෙ. අඳුන ගත්ත නේද? එහෙනං රාලහාමි අපි යඤ්ඤං.."

රාලහාමිට තරු පෙනුණා. සැලියුට් එකක් ගහන්න අත උස්සන්න කල්පනා වෙද්දි කාරෙක වේගෙන් ඇදිලා ගියා. අපේ හාදයා බය වුණ පාර පණ එපා කියලා පොලිසියට දුවගෙන ආවා.

මිනිහට කතා කරගන්න බැරි වුණා. මං ඇහුවා මොකෝ තමුසෙ බැරියර් රාජකාරි දාලා ආවේ කියලා.."සර්...සර්...ජ..ජ.." රාලහාමි ගොත ගහන්න පටන් ගත්තා.

 

ඒ යුද්ධ කාලෙ එතුමා මහ රෑ ඔහොම ගියේ ආරච්චිකට්ටුවට. පොඩි හොර ගමනක්. මං ඒ බව දැනගත්තෙ අපේ ලොක්කගෙන්. ලොක්ක කිව්වේ මාසෙකට විතර වතාවක් එතුමා ඔය ගමන යනවා කියලා. දැන් නං එහෙම දකින්න ගිය කෙනා ඉන්නෙ කැනඩාවෙලු. 

 

මට මේ කතාව ඊයේ පෙරේදා වෙච්චි හයිවේ අනතුරක් එක්ක මතක් වුණා.

 

  

හෙන්රි වර්ණකුලසූරිය