සමාජ සත්කාරයකට ආරාධනා..!
අපේ හිතවතෙක් අධ්යාපන ශිෂ්යත්ව වැඩසටහනකට දරුවන් හඳුන්වා දෙන්නැයි ඉල්ලා සිටියා. ඒ අනුව ඉගෙනීමේ දක්ෂ, ඉතා දුගී පවුලක දරුවන් තෝරාගත්තා.
ඒ පවුලේ පියා හෘද රෝගියෙක්. රැකියාවක් නොකරන්නැයි වෛද්යවරුන් නිර්දේශ කොට ඇතත් සුළු වශයෙන් මහන්සි වී බ්ලොක් ගල් හදනවා. මව දවස් කුළී රස්සාවක් කරනවා.
මේ පවුලේ දියණියන් තිදෙනයි. ඉගෙනගන්නේ 5, 9 හා 10 වසරවල.
ඔවුන් ගැන දැන සිටියේ අමාරුවෙන් දරුවන්ට උගන්නන්නට මහන්සි වන දෙමාපියන් ලෙස පමණයි.
දරුවන්ට අධ්යාපනය සඳහා මාසික ආධාර දීමට යාමේදී තමයි දැන ගත්තේ ඔවුනට වැසිකිළියක් නැති බව. ඔවුන් පාවිච්චි කරන්නේ තරමක් එහායින් වූ ඥාතියෙකුගේ වැසිකිළියක්.
ඒ බව කලින් කී හිතවතාට පැවසූ විට තැනීම ආරම්භ කොට අතරමග නැවතුණු වැසිකිළිය නිමවා ගැනීමට අවශ්ය ප්රතිපාදන සැපයීමත් බාර ගත්තා.
මේ සමඟ පළ කරන්නේ නිවසේ ඡායාරූප කීපයක්. ගැහැණු දරුවන් තිදෙනෙකු සිටින (දෙදෙනෙකු වැඩිවියට පත් වූ) පවුලේ පස් දෙනා දිවි ගෙවන්නේ බිත්ති බැඳ, වහලයක් ඇති, බිමට සිමෙන්ති නොදැමූ, පස් ගෙබිමෙන් යුතු නිවසකයි.
ඔව්...දූවිල්ල පිරි පස් ගෙබිමක්.....
නිවසක් නොතිබුණු, ඥාති නිවසක කාමරයක දිවි ගෙවමින් සිටි ඔවුන්ට, තමන්ට කියා ගෙපැළක් හදා ගන්නට රජයෙන් ලද ආධාර මුදලක් ලැබුණා. ඊට මදි පාඩුවට බැංකු දෙකකින් ගත් ණය මුදලට මාසික වාරික ලෙස
රු. 18000/= ක් මාසිකව ගෙවනවා. ඒ අතර තමයි ගෙහිමියාට හෘද රෝගය සැදී ඇත්තේ.
මාසිකව රු. 18000/= ක් ගෙවනවා කියන්නේ ලේසිපාසු කටයුත්තක් නොවන බව පැහැදිලියි. සෙල්ලම් බඩු හදන නිවසක කුළී රැකියාවක් කරමින් දවසකට රු. 1000/= බැගින් දරුවන්ගේ මව උපයන මුදලින් තමයි මේ ණය ගෙවන්නේ.
හරියට කුසට අහරක් නැතිව මේ පවුල ගත කරන්නේ ඉතා දුෂ්කර දිවියක්.
අපේ හිතවතුන්ගෙන් ඉල්ලා සිටින්නේ මේ නිවසේ ගෙබිමට සිමෙන්ති දමා, දරුවන්ට ආරක්ෂිතව ස්නානය කිරීමේ ආවරණය වූ නාන කාමරයක් තනා දීමට උදව් කරන ලෙසයි. නළ ළිඳ වටා ඉටිරෙදි වලින් ආවරණය කරගෙන තමයි ගැහැනු දරුවන් නාන්නේ.
නිවස කපරාරු කිරීම, ජනෙල් සවි කොට දීම වැනි අවශ්ය හැමදේම කරන්න අපට කරන්න බැරි වෙයි. ඒත් අවම අවශ්යතා සපුරා දීමට උත්සහයක් ගන්නයි අපේ අරමුණ.
දැනට මූලික අවශ්යතා සපුරා දෙමු. මුදල් නිසි ලෙස යෙදවීම හා වැඩකටයුතු අධීක්ෂණය පිළිබඳ වගකීම අපි බාර ගන්නවා.
ලැබෙන මුදල් පාරදෘශ්ය බවින් යුතුව කළමනාකරණය කිරීම අපේ වගකීමක්.
මොවුන්ගේ ජීවන මට්ටම මඳකින් හෝ ඉහළ දැමීම සඳහා සුළුවෙන් හෝ හැකි පමණින් ඔබේ කාරුණික උදව්ව ඇවැසි මොහොතක්.
(අප කළ හා කරමින් ඉන්නා සමාජ සත්කාර දෙකක් ගැන මේ මොහොතේ සඳහන් කරන්න කැමතියි.
* වසරකට පමණ පෙර වැසිකිළියක් තනාදී වැහිවතුරෙන් යට වෙන පැල්පත වෙනුවට බාගෙට ඉදිකොට තිබූ නිවස නිමා කොට දුන්නා.
* පියා ගහකින් වැටී මියගිය පවුලේ දරුවන් තිදෙනාගේ අධ්යාපනයටත්, මාසික ආහාර පාන ලබා දීමටත් උදව් කරනවා.)
කෙලින්ම ඔවුන්ගේ බැංකු ගිණුමට හෝ අප හරහා හෝ උදව් කරන්නට කැමැති අයට 0779427650 දුරකථනයට අමතා හෝ WhatsApp පණිවුඩයක් එවා ගිණුම් විස්තර ලබා ගන්න පුළුවන්.
